ກົມອຸດສາຫະກຳປຸງແຕ່ງ ຈັດຝຶກອົບຮົມການຄຸ້ມຄອງການນຳໃຊ້ທາດເຄມີໃຫ້ປອດໄພ ແລະ ການນຳໃຊ້ລະບົບຖານຂໍ້ມູນເຄມີແຫ່ງຊາດ ທີ່ແຂວງຫຼວງພະບາງ
ວັນທີ: 18-02-2026
ກົມອຸດສາຫະກຳປຸງແຕ່ງ, ກະຊວງອຸດສາຫະກຳ ແລະ ການຄ້າ ຮ່ວມກັບ ພະແນກອຸດສາຫະກຳ ແລະ ການຄ້າ ແຂວງຫຼວງພະບາງ ໄດ້ຈັດຝຶກອົບຮົມກ່ຽວກັບ “ການຄຸ້ມຄອງການນຳໃຊ້ທາດເຄມີໃຫ້ປອດໄພ ແລະ ການນຳໃຊ້ລະບົບຖານຂໍ້ມູນເຄມີແຫ່ງຊາດ” ຂຶ້ນໃນລະຫວ່າງວັນທີ 18-19 ກຸມພາ 2026. ໂດຍການເປັນປະທານຂອງ ທ່ານ ປອ ບຸນເພັງ ສີບຸນເຮືອງ, ຫົວໜ້າກົມອຸດສາຫະກຳປຸງແຕ່ງ ແລະ ທ່ານ ປອ ສຸລິໄຊ ຫົງສາຄອນ, ຮັກສາການຫົວໜ້າພະແນກອຸດສາຫະກຳ ແລະ ການຄ້າ ແຂວງຫຼວງພະບາງ.
ການຝຶກອົບຮົມໃນຄັ້ງນີ້ ມີຈຸດປະສົງຫຼັກເພື່ອສ້າງຄວາມເຂັ້ມແຂງໃຫ້ແກ່ບຸກຄະລາກອນໃນຂະແໜງການອຸດສາ ຫະກຳ ແລະ ການຄ້າ ໃຫ້ມີຄວາມຮູ້, ຄວາມສາມາດ ແລະ ທັກສະໃນການປະສານງານວຽກງານຄຸ້ມຄອງເຄມີໃຫ້ມີປະສິດທິພາບສູງຂຶ້ນ.
ຄວາມສຳຄັນຂອງວຽກງານຄຸ້ມຄອງເຄມີ
ໃນພິທີເປີດ, ທ່ານ ປອ ບຸນເພັງ ສີບຸນເຮືອງ ໄດ້ເນັ້ນໜັກວ່າ ວຽກງານຄຸ້ມຄອງເຄມີແມ່ນມີຄວາມສຳຄັນຢ່າງຍິ່ງ ເພາະຕິດພັນໂດຍກົງກັບຊີວິດປະຈຳວັນ ແລະ ການພັດທະນາເສດຖະກິດ-ສັງຄົມ. ບໍ່ວ່າຈະເປັນໃນຂະແໜງອຸດສາຫະກຳປຸງແຕ່ງ, ກະສິກຳຫຼື ສາທາລະນະສຸກ ລ້ວນແຕ່ມີການນຳໃຊ້ເຄມີ. ດັ່ງນັ້ນ, ການຄຸ້ມຄອງ, ການເກັບຮັກສາ ແລະ ການກຳຈັດທີ່ຖືກຕ້ອງຕາມຫຼັກວິຊາການ ຈຶ່ງເປັນສິ່ງຈຳເປັນ ເພື່ອຫຼີກລ່ຽງຜົນກະທົບຕໍ່ສຸຂະພາບ, ຊີວິດ, ຊັບສິນ ແລະ ສິ່ງແວດລ້ອມ.
ການຍົກລະດັບການຄຸ້ມຄອງສູ່ລະບົບທັນສະໄໝ
ປະຈຸບັນ, ກະຊວງອຸດສາຫະກຳ ແລະ ການຄ້າ ໄດ້ເອົາໃຈໃສ່ຢ່າງຈົດຈໍ່ໃນການສ້າງລະບຽບການລຸ່ມກົດໝາຍ, ການສ້າງບັນຊີເຄມີອັນຕະລາຍ 4 ປະເພດ, ລວມໄປເຖິງການພັດທະນາ "ລະບົບຖານຂໍ້ມູນເຄມີແຫ່ງຊາດ" ເພື່ອໃຫ້ການຄຸ້ມຄອງວຽກງານເຄມີໃນຂອບເຂດທົ່ວປະເທດມີຄວາມເປັນເອກະພາບ ແລະ ທັນສະໄໝ.
ເນື້ອໃນການຝຶກອົບຮົມ
ຕະຫຼອດໄລຍະ 2 ວັນ, ຜູ້ເຂົ້າຮ່ວມ ເຊິ່ງປະກອບມີຄະນະພະແນກ ແລະ ວິຊາການຈາກພະແນກອຸດສາຫະກຳ ແລະ ການຄ້າ ທົ່ວປະເທດ ຈະໄດ້ຮຽນຮູ້ກ່ຽວກັບ:
- ຫຼັກການຄຸ້ມຄອງການນຳໃຊ້ເຄມີໃຫ້ມີຄວາມປອດໄພ.
- ວິທີການນຳໃຊ້ລະບົບຖານຂໍ້ມູນເຄມີແຫ່ງຊາດ.
- ການແລກປ່ຽນບົດຮຽນ ແລະ ວິທີການປະສານງານລະຫວ່າງສູນກາງ ແລະ ທ້ອງຖິ່ນ.
ໃນຕອນທ້າຍຂອງພິທີເປີດ, ທ່ານປະທານໄດ້ຮຽກຮ້ອງໃຫ້ຜູ້ເຂົ້າຮ່ວມທຸກທ່ານ ຈົ່ງພ້ອມກັນເອົາໃຈໃສ່ຄົ້ນຄວ້າ ແລະ ສົນທະນາແລກປ່ຽນ ເພື່ອຍາດແຍ່ງເອົາຄວາມຮູ້ໄປຜັນຂະຫຍາຍເຂົ້າໃນວຽກງານຕົວຈິງໃຫ້ເກີດໝາກຜົນສູງສຸດ.
