ກອງປະຊຸມປຶກສາຫາລື ກ່ຽວກັບການກໍານົດ ແຜນການປ້ອງກັນ ແລະ ແກ້ໄຂອຸບປະຕິເຫດທາງເຄມີ ຂອງບໍລິລັດ ລາວຊານຕາອາວເຄີ ວັດສະດຸໃໝ່ ຈໍາກັດຜູ້ດຽວ
ວັນທີ: 18-03-2026
ໃນວັນທີ 10 ມີນາ 2026 ເວລາ 13:30 ໂມງ, ກົມອຸດສາຫະກໍາປຸງແຕ່ງ ກະຊວງອຸດສາຫະກໍາ ແລະ ການຄ້າ ໄດ້ສົມທົບກັບພາກສ່ວນກ່ຽວຂ້ອງ ລົງເຄື່ອນໄຫວຕິດຕາມກວດກາ ແລະ ຈັດກອງປະຊຸມປຶກສາຫາລື ກ່ຽວກັບ ແຜນແຜນຄຸ້ມຄອງ ແລະ ແກ້ໄຂອຸບປະຕິເຫດທາງເຄມີ ຂອງບໍລິສັດ ລາວຊານຕາອາວເຄີ ວັດສະດຸໃໝ່ ຈໍາກັດຜູ້ດຽວ ຊຶ່ງຕັ້ງຢູ່ເຂດພັດທະນາກວມລວມໄຊເຊດຖາ, ບ້ານນາໂນ, ເມືອງໄຊເສດຖາ, ນະຄອນຫຼວງວຽງຈັນ. ໂດຍການເປັນປະທານຂອງ ທ່ານ ໄວຍາກອນ ສີສາຫວັດ, ຫົວໜ້າພະແນກຄຸ້ມຄອງເຄມີ, ກົມອຸດສາຫະກຳປຸງແຕ່ງ ແລະ ມີຜູ້ເຂົ້າຮ່ວມທັງໝົດ 18 ທ່ານ, ຊຶ່ງປະກອບມີ ກົມກວດກາຊັບພະຍາກອນທໍາມະຊາດ ແລະ ສິ່ງແວດລ້ອມ, ກະຊວງກະສິກໍາ ແລະ ສິ່ງແວດລ້ອມ, ຫ້ອງການຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ ແລະ ບໍລິສັດ. ຈຸດປະສົງຫຼັກ ຂອງກອງປະຊຸມ ແມ່ນແນໃສ່:
- ຕິດຕາມກວດກາຄືນການແກ້ໄຂບັນຫາເຄມີຮົ່ວໄຫຼ ຈຳນວນ 3 ຄັ້ງໃນໄລຍະຜ່ານມາ ພ້ອມທັງກຳນົດ, ບັນດາສາຍເຫດຕົ້ນຕໍທີ່ພາໃຫ້ເກີດອຸບັດເຫດໃນແຕ່ລະຄັ້ງ, ພ້ອມດ້ວຍວິທີການແກ້ໄຂ ທີ່ໄດ້ຈັດຕັ້ງປະຕິບັດຕອບໂຕ້ອຸບປະຕິເຫດ;
- ແຜນການປ້ອງກັນ ແລະ ແກ້ໄຂອບປະຕິເຫດໃນຕໍ່ໜ້າ;
- ການສ້າງຕັ້ງໜ່ວຍງານສິ່ງແວດລ້ອມ ແລະ ຄວາມປອດໄພທາງເຄມີ ປະຈໍາໂຮງງານ;
- ການຕິດຕັ້ງເຄື່ອງມືອຸປະກອນ ໃນການປ້ອງກັນ ແລະ ຕອບໂຕ້ອຸບປະຕິເຫດ;
- ການຕິດສະຫຼາກເຄມີ ທີ່ຖືກຕ້ອງ, ສອດຄ່ອງກັບກົດໝາຍ ແລະ ລະບຽບການ;
- ປະເມີນຜົນກະທົບທີ່ອາດເກີດຂຶ້ນຕໍ່ສຸຂະພາບ ແລະ ສິ່ງແວດລ້ອມ.
ໃນຕອນທ້າຍຂອງກອງປະຊຸມ, ຄະນະກວດກາ ແລະ ບໍລິສັດ ໄດ້ຮ່ວມກັນປຶກສາຫາລືກ່ຽວກັບແຜນການປ້ອງກັນໃນໄລຍະຍາວ ເພື່ອຮັບປະກັນບໍ່ໃຫ້ເກີດເຫດການຮົ່ວໄຫຼຊໍ້າຮອຍຂຶ້ນອີກ, ລວມເຖິງການກຳນົດມາດຕະຖານໃນການກຳຈັດ ຫຼື ບຳບັດສິ່ງເສດເຫຼືອເຄມີ ໃຫ້ຖືກຕ້ອງຕາມລະບຽບການ ແລະ ຫຼັກການທາງດ້ານເຕັກນິກຢ່າງເຂັ້ມງວດ ກອງປະຊຸມໄດ້ປິດລົງ ໃນເວລາ 16:30 ໂມງ ຂອງວັນດຽວກັນ.
